20 მაისიდან დიდ ბრიტანეთში კვლავ შესაძლებელია რუსული ნავთობისგან წარმოებული პროდუქტების — დიზელისა და საავიაციო საწვავის — იმპორტი. ლონდონმა სანქციები მოუხსნა იმ პროდუქტებს, რომლებიც მესამე ქვეყნებშია გადამუშავებული.

გაცემულ ლიცენზიას მოქმედების ვადა არ აქვს, თუმცა მთავრობა მას პერიოდულად გადახედავს. ასევე გაიცა ცალკე ლიცენზია — რუსული წარმოების გათხევადებული ბუნებრივი გაზის საზღვაო გზით ტრანსპორტირებისთვის 2027 წლის 1 იანვრამდე. უკრაინაში ომის გამო რუსეთისთვის დაწესებული სხვა სანქციები ძალაშია.

ბრიტანეთმა სანქციების შემსუბუქება ირანის ბირთვული ობიექტებზე აშშ-ისრაელის სამხედრო ოპერაციის ფონზე გადაწყვიტა. ოპერაციის შედეგად ჰორმუზის სრუტე გადაიკეტა — ნავთობის ტრანსპორტირების ერთ-ერთი ყველაზე სტრატეგიული არხი, — რამაც მსოფლიო ბაზარზე მიწოდების პრობლემა და საწვავის მასიური გაძვირება გამოიწვია.

Reuters-ის ცნობით, ბრიტანეთში საწვავის გაძვირებამ გაზარდა ზეწოლა მთავრობაზე, რომელიც ენერგორესურსებზე ხელმისაწვდომობის პრობლემის მოგვარებას ცდილობს.

Bloomberg-ის მონაცემებით, ამ კრიზისის ფონზე, უკრაინის ომის დაწყებიდან ყველაზე მაღალ ნიშნულს მიაღწია რუსეთის ნავთობექსპორტიდან მიღებულმა შემოსავლებმა — 3 მაისამდე პერიოდში კვირაში საშუალოდ 2,42 მილიარდი დოლარი.

შეერთებულმა შტატებმა 18 მაისს ასევე 30 დღით გაახანგრძლივა საზღვაო გზით რუსული ნავთობის იმპორტის ლიცენზია — იმავე მიზეზით.