გაერთიანებულმა სამეფომ რუსეთის წინააღმდეგ სანქციების მასშტაბური პაკეტი გამოაქვეყნა. შეზღუდვები 85 ფიზიკურ და იურიდიულ პირს შეეხო — ისინი პასუხისმგებელნი არიან უკრაინელი ბავშვების იძულებით დეპორტაციაში, მათ მილიტარიზაციასა და კრემლის საინფორმაციო ომის კამპანიებში.

ბრიტანეთის მთავრობა ამ ნაბიჯს ერთ-ერთ ყველაზე მკაცრ პასუხად აფასებს რუსეთის მრავალფრონტიანი მტრული საქმიანობის წინააღმდეგ.

სანქციების პაკეტი ასევე ახელს რუსეთის მცდელობებს სომხეთის მოახლოებულ საპარლამენტო არჩევნებზე გავლენის მოხდენისა. დოკუმენტების მიხედვით, „სოციალური დიზაინის სააგენტო” (SDA) და ANO Dialog ორგანიზაცია კრემლის ადმინისტრაციისა და სპეცსამსახურების დავალებით სომხეთში პრორუსული ძალების გაძლიერებასა და ხელისუფლების ცვლილების ხელშეწყობაზე მუშაობდნენ.

სანქცირებულთა სიაში შედიან პირები, რომლებიც 20 000-ზე მეტი უკრაინელი ბავშვის გადასახლებასა და იდეოლოგიურ დამუშავებაზე არიან პასუხისმგებელნი. მათ შორის — ე.წ. „მეომართა ცენტრი” (Warrior Centre), სადაც ბავშვებს სამხედრო წვრთნებს უტარებენ და უკრაინული იდენტობის წაშლას ცდილობენ.

„დიდი ბრიტანეთი გულხელდაკრეფილი არ უყურებს, როგორ ცდილობს პუტინი ტყუილებისა და პროკრემლისტური ნარატივების გავრცელებას. ეს სანქციები პასუხია რუსეთის მცდელობებზე — დააზიანოს დემოკრატია და გაანადგუროს უკრაინის მომავალი ბავშვების ამაზრზენი დეპორტაციით,” — განაცხადა საგარეო საქმეთა მდივანმა ივეტ კუპერმა.

სანქციებთან ერთად, ბრიტანეთი დამატებით 1.2 მილიონ ფუნტ სტერლინგს გამოყოფს დეპორტირებული უკრაინელი ბავშვების მოძიებისა და იდენტიფიცირების პროგრამებისთვის. სახსრები მოხმარდება ვერიფიკაციის ცენტრებს, რომლებიც გაეროს კომისიას რუსეთის ქმედებების, როგორც კაცობრიობის წინაშე ჩადენილი დანაშაულის, დამტკიცებაში ეხმარებიან.

ამჟამად გაერთიანებულ სამეფოს რუსეთის წინააღმდეგ ჯამში 3 300-ზე მეტი სანქცია აქვს დაწესებული.