გაერთიანებულმა სამეფომ რუსეთს სანქციების ახალი, მასშტაბური პაკეტი დაუწესა. შეზღუდვები 85 ფიზიკურ და იურიდიულ პირს შეეხო, რომლებიც უკრაინელი ბავშვების იძულებით დეპორტაციაში, მათ მილიტარიზაციასა და კრემლის დეზინფორმაციის კამპანიებში მონაწილეობდნენ.

სანქცირებულთა სიაში მოხვდა ე.წ. „მეომართა ცენტრი” (Warrior Centre) — ობიექტი, სადაც 20 000-ზე მეტ გადასახლებულ უკრაინელ ბავშვს სამხედრო წვრთნებს უტარებენ და უკრაინული იდენტობის წაშლას ცდილობენ.

„დიდი ბრიტანეთი გულხელდაკრეფილი არ უყურებს, როგორ ცდილობს პუტინი ტყუილებისა და პრო­კრემ­ლი­ს­ტუ­რი ნარატივების გავრცელებას. ეს სანქციები პასუხია რუსეთის მცდელობებზე, დააზიანოს დემოკრატია და გაანადგუროს უკრაინის მომავალი ბავშვების ამაზრზენი დეპორტაციით”, — განაცხადა საგარეო მდივანმა ივეტ კუპერმა.

სანქციები ასევე მიმართულია სომხეთში რუსეთის ჩარევის წინააღმდეგ. ბრიტანული მხარე ამხელს, რომ „სოციალური დიზაინის სააგენტო” (SDA) და ორგანიზაცია ANO Dialog კრემლის დავალებით სომხეთის 7 ივნისის არჩევნებამდე პრო­რუ­სუ­ლი ძალების გასაძლიერებლად მუშაობდნენ.

სანქციებთან ერთად, ლონდონი დამატებით 1,2 მილიონ ფუნტ სტერლინგს გამოყოფს გადასახლებული უკრაინელი ბავშვების მოძიებისა და იდენტიფიცირების პროგრამებისთვის. ეს სახსრები გაეროს საგამოძიებო კომისიას რუსეთის ქმედებების კაცობრიობის წინაშე ჩადენილ დანაშაულად კვალიფიცირებაში ეხმარება.

ჯამში, გაერთიანებულ სამეფოს რუსეთის წინააღმდეგ 3 300-ზე მეტი სანქცია აქვს დაწესებული.