„ბოლო ზარის” ავტოკოლონები ყოველ მაისს ქართული ქუჩების ნაწილი ხდება. ამ წელს სოციალურ ქსელებში კი გავრცელდა ვიდეოები, სადაც ძვირადღირებული სპორტული ავტომობილებით მომავალი კურსდამთავრებულები ჩანან — მაგრამ ასევე ისეთებიც, ვინც ავარიაში მოყვა.

სამი ავარია ერთ კვირაში

ტყვიავი-ძევერის გზაზე მკვეთრი დამუხრუჭების გამო ორი ავტომანქანა ერთმანეთს შეეჯახა — დაშავებული არ ყოფილა. თელავთან, სოფელ წინანდალთან — რამდენიმე ბავშვი და ერთი მშობელი დაშავდა. გურჯაანში, სოფელ ვაჩნაძიანთან ავტომობილი ტრაილერს შეეჯახა — ხუთი ადამიანი დაშავდა.

ბავშვები — ემოციების გავლენით

„ბოლო ზარზე ძალიან მაგარი მანქანით უნდა მივიდე!” — ეს სიტყვები 15 წლის გოგოს ეკუთვნის, რომელმაც სოციალურ ქსელში ვიდეო ნახა. რადიო თავისუფლებასთან ლაპარაკში მე-12 კლასელები ამბობენ: „ვინ როგორი მანქანით მოვა — ყველა ამას უყურებს. ძაან ქულ ხარ, თუ ეგეთი მანქანით მიხვალ.”

ექსპერტები: ცვლილებები საჭიროა

გაეროს საგზაო უსაფრთხოების პროექტების ექსპერტი გელა კვაშილავა ამბობს, რომ ამ საფრთხის შესახებ იციან მშობლებმა, პოლიციამ, სკოლამ და განათლების სამინისტრომ — მაგრამ სულ იგივე მეორდება.

„„ბოლო ზარი” — სიმბოლური სიტყვა. მართლა შეიძლება ბოლო იყოს, თუ რამე არ შეიცვალა”, — განაცხადა ექსპერტმა.

მისი შეფასებით, პრიმარული ნაბიჯი ახალბედა მძღოლების კონტროლია: „იზეიმონ, მაგრამ წესები უნდა დაიცვან — ისევე, როგორც ნებისმიერ განვითარებულ ქვეყანაში.”