ახალი პატრიარქის მემკვიდრეობა შეფასდება იმის მიხედვით, თუ განამტკიცებს ის ქრისტიანულ ღირებულებებსა და ეკლესიის დამოუკიდებლობის პრინციპს — ამის შესახებ ფედერალისტური პარტიის ლიდერმა გიგა ბოკერიამ სოციალური ქსელის პოსტში განაცხადა.

„ქრისტიანული მრწამსი იყო ის ფუნდამენტი, რომელმაც შეკრა ქართული ეროვნული იდენტობა და განსაზღვრა ჩვენი კუთვნილება დასავლური, თავისუფალი სამყაროსადმი. არაერთი გარე მტერი წარუმატებლად შეეცადა ტირანული ძალადობით ამ იდენტობის წაშლას,” — წერს ბოკერია.

მისი შეფასებით, რუსული იმპერიალიზმი „ერთმორწმუნეობის” ყალბი გზავნილის გამოყენებით ცდილობდა საქართველოს დამორჩილებას, ხოლო საბჭოთა ტოტალიტარული რეჟიმი სისხლიანი რეპრესიების პარალელურად ფსევდორელიგიურ გზავნილებს იყენებდა. ბოკერიას აზრით, ეს სტრატეგია დღესაც გრძელდება.

„ეს იყო და არის საქართველოს მტრის სტრატეგიის ერთ-ერთი ხაზი — რელიგიურ ერთობაზე ფარისევლური აპელირებით და ანტიქრისტიანული პროპაგანდით წაშალოს ჩვენი იდენტობა და შეაჩეროს თავისუფლებისკენ საქართველოს სწრაფვა.”

ბოკერია ამბობს, რომ ახალი პატრიარქის მემკვიდრეობა შეფასდება იმის მიხედვით, თუ რომელ გზას აირჩევს შიო III:

განამტკიცებს თუ არა პიროვნების ღირსებას, თავისუფლებასა და პასუხისმგებლობას, კანონის უზენაესობასა და კანონის წინაშე თანასწორობას, ეკლესიის დამოუკიდებლობასა და ხელისუფლებასა და ეკლესიას შორის გამიჯვნის პრინციპს.

„თუ პირიქით, ნებას მისცემს საქართველოს მტრებს მართლმადიდებელი ეკლესიის სახელი სამოქალაქო თავისუფლების წინააღმდეგ, დასავლური ცივილიზაციისგან საქართველოს ჩამოსაშორებლად და საბოლოოდ, ქართული ეკლესიისა და ქართული სახელმწიფოებრიობის წინააღმდეგ გამოიყენონ,” — ამბობს ბოკერია.

შეგახსენებთ, რომ საქართველოს მართლმადიდებელი ეკლესიის გაფართოებული კრება შიო III-ს 142-ე კათოლიკოს-პატრიარქად გუშინ, სამების საკათედრო ტაძარში, 22 ხმით აირჩევდა.