ევროპის საბჭოს მინისტრთა კომიტეტის 135-ე სესიაზე, სადაც საქართველოს საგარეო მინისტრი მაკა ბოჭორიშვილი მონაწილეობდა, მოლდოვამ „იმედის”, „რუსთავი 2”-ისა და „პოსტივის” ჟურნალისტებს შეხვედრის გაშუქება ფიზიკურად შეუძლებელი გახადა — ოთხივე სასაზღვრო გამშვებ პუნქტზე მათ შესვლაზე უარი მიიღეს.

ბოჭორიშვილმა ამ ფაქტი სხდომაზე პირდაპირ განაცხადა: „შემაშფოთებელია, როდესაც სიტყვის თავისუფლება და მედიის თავისუფლება შერჩევითი პრინციპით განიმარტება.”

მან ასევე ხაზი გაუსვა, რომ ორმაგი სტანდარტია, ევროპულ ღირებულებებზე სიტყვით ლაპარაკი, ხოლო ქმედებით — სხვა მიმართულება: „თვალთმაქცობაა „დემოკრატიის უკუსვლაზე” წუხილი და იმავდროულად იმ ძალების წახალისება, რომლებიც არჩევნებზე უარს ამბობენ. კანონის უზენაესობაზე საუბარი — ამავე დროს კი სამართლის გვერდის ავლის გზების ძიება.”

ბოჭორიშვილმა ასევე ახსენა საქართველოს ოკუპირებული ტერიტორიები: „ოკუპაცია, ეფექტიანი კონტროლი და რუსეთის პასუხისმგებლობა ადამიანის უფლებების მძიმე დარღვევებზე დადასტურებულია საერთაშორისო სასამართლოების მიერ. მიუხედავად ამისა, რუსეთი კვლავ დგამს ნაბიჯებს ანექსიისკენ — ამის დასტურია 9 მაისს ცხინვალში ხელმოწერილი ე.წ. „მოკავშირეობის” ხელშეკრულება.”

მოლდოვის საგარეო უწყება ოფიციალურ კომენტარში მხოლოდ ფორმალურ პასუხს იძლევა — რომ განხილვის შემდეგ, ტელეარხების მოთხოვნები „ვერ დადასტურდა” და „შიდა განხილვის პროცედურებთან” დაკავშირებით კომენტარი შეუძლებელია.

ამ ინციდენტის ფონზე გახდა ცნობილი, რომ ევროპარლამენტმა სანქცირებულ ტელეკომპანია „იმედს” ბრიუსელში საქმიანობა ერთი წლით უკვე შეუჩერა.