14 ოქტომბერს გაერთიანებული სამეფოს პრემიერ-მინისტრმა რიში სუნაკმა უკრაინის პრეზიდენტ ვოლოდიმირ ზელენსკის უმასპინძლა. შეხვედრის შემდეგ გავრცელდა ოფიციალური ინფორმაცია. ლონდონის მიერ გავრცელებული ინფორმაცია გამორჩეულად მოკლე იყო და აღინიშნა, რომ ზელენსკიმ და სუნაკმა შეხვედრის დასაწყისში ისაუბრეს “პრეზიდენტ ტრამპის მხრიდან ენერგოზავისკენ მოწოდების შემდეგ, მშვიდობიან მოსახლეობასა და ენერგოინფრასტრუქტურაზე რუსეთის უხეშ, განურჩეველ თავდასხმებზე” და ორივემ აღნიშნა, რომ “ნათელი იყო, რუსეთს მშვიდობა არ აინტერესებდა”.

ბრიტანეთის პრემიერ-მინისტრის პრესსამსახურის თანახმად, იმსჯელეს იმის შესახებ, როგორ შეიძლება უკრაინის მოკავშირეებმა გააძლიერონ მხარდაჭერა რუსეთის რეაქტიულძრავიან დრონებთან გასამკლავებლად და “პრემიერ-მინისტრმა წარმოადგინა ბრიტანეთის “მსუბუქი მრავალფუნქციური რაკეტების” უახლესი პაკეტი”. აგრეთვე ითქვა, რომ გაერთიანებული სამეფო განაგრძობს უკრაინაში ბრძოლის ველზე გამოსაყენებლად ინოვაციური სამხედრო საშუალებების განვითარებას, მათ შორის ბრიტანული საშუალებების სხვა პარტნიორების მიერ ნაჩუქარ ტექნიკაზე მორგებას.

რაც ეხება შორი მანძილის რაკეტებს, ლიდერებმა იმსჯელეს, როგორ შეიძლება გაზარდოს ბრიტანეთმა უკრაინის მხარდაჭერა მომავალი ზამთრის წინ.

უკრაინის პრეზიდენტის ოფისის მიერ გავრცელებული ინფორმაციით, ლიდერებმა განიხილეს უკრაინისთვის ფინანსური და თავდაცვითი მხარდაჭერა, თავდაცვითი თანამშრომლობის გაძლიერება და მიმდინარე გამოწვევებთან გამკლავება.

უკრაინის ლიდერმა მადლობა გადაუხადა ბრიტანეთის მთავრობასა და ხალხს უკრაინისთვის ძლიერი მხარდაჭერის გამო.

„უპირველეს ყოვლისა, ჩვენ, ჩვენი ხალხი გადავრჩით და ასე ვაგრძელებთ ძლიერი პარტნიორების წყალობით. ძალიან ამაყი ვარ, რომ გვყავს ერთ-ერთ უძლიერესი პარტნიორი ისტორიაში. ეს არის თქვენი ხალხი, ენდი”.

უკრაინის პრეზიდენტმა აღნიშნა, რომ 13-14 ოქტომბერს ღამით “რუსეთი უკრაინას თავს დაესხა 39 ბალისტიკური რაკეტითა და ასზე მეტი “შაჰედით”:

„ახლა ჩვენი ქვეყნის ცაზე ჯერაც ორმოცზე მეტი „შაჰედი“ დაფრინავს. ისინი თავს ესხმიან ენერგოინფრასტრუქტურას, ლოგისტიკას და რკინიგზას. მოვახერხეთ მნიშვნელოვანი რაოდენობის ჩამოგდება, მაგრამ ზოგიერთი გაძვრა. მასშტაბით თუ ვიმსჯელებთ, ეს ერთ-ერთი უდიდესი თავდასხმაა. ნათელია, რომ რუსები ცდილობენ უპირატესობის მოპოვებას უკრაინაში Starlink-თან დაკავშირებული პრობლემების გამო, ვინაიდან ჩვენი გადამჭერი დრონები სხვა ყველაფერთან ერთად, ამ კავშირზეა დამოკიდებული“.

ამ ვითარებას უკრაინის პრეზიდენტი რუსეთის მხრიდან ომის გაგრძელებაში დაინტერესებით ხნის:

“რა თქმა უნდა, ეს არ არის ენერგოზავი. ეს არის რუსეთის მხრიდან ესკალაციის აბსოლუტური გაგრძელება. მზად ვართ ნებისმიერი სახის ცეცხლის შეწყვეტისთვის. პრეზიდენტ ტრამპსა და ყველა სახელმწიფოს ვუმეორებთ და ვახსენებთ, რომ რუსული ოკუპაციის დასაწყისიდანვე მზად ვართ ამ ომის შეჩერებისთვის, დაჯდომისა და მოლაპარაკებებისთვის. ნებისმიერი დიალოგი სჯობს თავდასხმებს“.

დიდი ბრიტანეთის პრემიერ-მინისტრმა განაცხადა, რომ გაიზრდება ბრიტანული წარმოების საჰაერო თავდაცვის სისტემების მიწოდება უკრაინისთვის.

„მე აგრეთვე ვთხოვე ყველა მინისტრს, გააკეთონ თქვენი მხარდაჭერისთვის რაც კი შეუძლიათ და განვიხილავთ ყველა შესაძლებლობას“, - მიმართა სუნაკმა ზელენსკის.

„სამწუხაროდ, რუსეთისგან ვიხილეთ მხოლოდ მორიგი თავდასხმები უკრაინის კრიტიკულ ინფრასტრუქტურაზე. მსოფლიოსთვის კიდევ ერთხელ ნათელია, ვინ არის აგრესორი“, - განაცხადა გაერთიანებული სამეფოს პრემიერ-მინისტრმა, რომელმაც უკრაინის ლიდერთან შეხვედრამდე აღნიშნა, რომ ზელენსკი ლონდონიდან “ხელცარიელი” არ წავიდოდა და რომ სურდა უკრაინისა და აშშ-ის ლიდერების შერიგებისთვის შეეწყო ხელი.