„ქართული ოცნების” საპატიო თავმჯდომარის, ბიძინა ივანიშვილის ვაჟი ბერა ოჯახთან ერთად ბაქოში იმყოფება. მასპინძელია აზერბაიჯანის პრეზიდენტ ილჰამ ალიევის ყოფილი სიძე — ბიზნესმენი და მომღერალი ემინ აგალაროვი.

„კეთილი იყოს შენი მობრძანება Sea Breeze-ში”, — დაწერა აგალაროვმა Instagram-ზე და ბერასთან ერთად გადაღებული კადრები გამოაქვეყნა. Sea Breeze კასპიის ზღვის სანაპიროზე მდებარე კურორტია ბაქოდან 30 წუთის სავალ მანძილზე.

ამ ვიზიტამდე ემინ აგალაროვი საქართველოში ჩამოვიდა; თბილისის აეროპორტში ბერა ივანიშვილი დახვდა. ვიდეომიმართვაში, სადაც ქართულ შთაბეჭდილებებზე ისაუბრა, აგალაროვმა ყურადღება გაამახვილა საქართველოს ტურისტულ პოტენციალზე — 14 წელში ტურიზმი 16-ჯერ გაიზარდა. ბიზნესმენი Sea Breeze-ში კაზინო ინდუსტრიის განვითარებაზეც მუშაობს — 1998 წლის შემდეგ მოქმედი აკრძალვა აზერბაიჯანში გაუქმდა.