BBC-ის რუსულმა სამსახურმა, „მედიაზონამ” და მოხალისეთა ჯგუფმა ნეკროლოგების, საფლავებისა და საბრძოლო მემორიალების ფოტოების, ასევე სახელმწიფო ღია მონაცემების ანალიზის საფუძველზე დაადგინეს 223 539 იმ რუსი სამხედროს ვინაობა, ვინც უკრაინაში შეჭრის დღიდან დაიღუპა.

დაღუპულთა შემადგენლობა ასე ნაწილდება: მოხალისეები — 82 224; დაუდგენელი სტატუსის მონაწილეები — 48 177; კონტრაქტით დაქირავებული სამხედროები — 45 923; მსჯავრდადებულები — 25 367; მობილიზებულები — 18 955.

BBC-ის სამსახურის შეფასებით, ეს სია მოიცავს რეალური დანაკარგების 45–65 პროცენტს, რაც ნიშნავს, რომ დაღუპული სამხედროების სრული რიცხვი 497 ათასამდე შეიძლება იყოს.

ეს შეფასება ახლოსაა დიდი ბრიტანეთის ხელისუფლების საკომუნიკაციო შტაბ-ბინის დირექტორის ენ კისტ-ბატლერის ვარაუდთან, რომელმაც ახლახან, პირველ საჯარო ლექციაში, განაცხადა, რომ რუსეთის მთლიანი დანაკარგები 500 ათასს უახლოვდება.