1 ივნისს ბათუმში, ე.წ. ბოს ქუჩაზე, ცენტრალური ბაზრის ტერიტორიაზე, 43 წლის როლანდ (როლიკა) დავითაძე ხელვაჩაურის რაიონის სოფელ ფერიადან — შუა ქალაქში, შვილის თვალწინ მოკლეს. შეიარაღებულმა კაცმა ტროტუარზე მდგომ სამიზნეს 8 ტყვია ესროლა და მიიმალა.

ადგილობრივების გადმოცემით, ვიქტიმი ცოლს სალონში ელოდა, როცა ყოფილი მეგობარი და ფერიაში მეზობელი ეგზომ შარაშიძე მოევლინა. „როლიკას დაუყვირია: „არ მესროლო.” 8 ტყვია დაახალა, ძირითადად ფეხებში ესროდა. ერთადერთი სასიკვდილო ტყვია გულზე დაკიდებულ ჯვარს მოხვდა — ტყვიამ ჯვარი სხეულში შეიტანა,” — ყვებიან თვითმხილველები.

დაჭრილი კლინიკაში გადაიყვანეს, მაგრამ ექიმებმა სიცოცხლე ვერ შეუნარჩუნეს. სიკვდილამდე ვიქტიმმა ცოლს მკვლელის ვინაობა გაანდო. მკვლელი 1 ივნისის ღამით ბოლოს ფერიის სასაფლაოზე დაინახეს — დღეს დაკავებული არ არის.

შინაგან საქმეთა სამინისტრო გამოძიებას 108-ე (განზრახ მკვლელობა) და 236-ე (ცეცხლსასროლი იარაღის უკანონო გამოყენება) მუხლებით აწარმოებს. პოლიციამ ეჭვმიტანილის სახლის ჩხრეკისას მრავალი სახეობის იარაღი ამოიღო.

ადგილობრივების სიტყვებით, დავითაძე საბერძნეთში მუშაობდა, ერთი წლის წინ დაბრუნდა, „მშრომელი და პატიოსანი ბიჭი იყო”. მკვლელობის ზუსტი მოტივი ჯერ დადგენილი არ არის.