9 ივნისს, დილით, მოსკოვის ოლქის ბალაშიხაში — კოლდუნოვის ქუჩაზე, სამხედრო მოსამსახურეებით დასახლებულ კვარტალში — BMW X3 აფეთქდა. ავტომანქანის მძღოლი დაიღუპა. ზოგიერთი რუსული და უკრაინული წყაროს ცნობით, მსხვერპლი შეიძლება იყოს რუსეთის თავდაცვის სამინისტროს სარაკეტო-საარტილერიო სამმართველოს უფროსი, გენერალი დამირ დავიდოვი.

კრემლის პრესსამსახურის ხელმძღვანელმა დმიტრი პესკოვმა 10 ივნისის ბრიფინგზე დაღუპულის ვინაობა არ გაამჟღავნა: „დეტალები გასაჯაროებას არ ექვემდებარება მიმდინარე გამოძიების გამო.” მისივე თქმით, პრეზიდენტ პუტინს ინციდენტის შესახებ მოახსენეს. რუსეთის საგამოძიებო კომიტეტმა სისხლის სამართლის საქმე აღძრა, თუმცა მუხლი არ დაუკონკრეტებია.

შემთხვევის ადგილი ემთხვევა სენსიტიურ ტოპოგრაფიას: „აგენტსტვოს” ინფორმაციით, ავტომანქანა ბალაშიხის კოლდუნოვის ქუჩის №10 სახლთან აფეთქდა — სწორედ 350 მეტრში იმ ადგილიდან, სადაც 2025 წლის აპრილში მოკლეს გენშტაბის მთავარი ოპერატიული სამმართველოს უფროსის მოადგილე, გენერალ-ლეიტენანტი იაროსლავ მოსკალიკი.

ეს ინციდენტი კიდევ ერთი ეპიზოდია მოსკოვის მახლობლად მაღალჩინოსანი სამხედრო ოფიცრების სერიული ლიკვიდაციის. 2024 წლის დეკემბერში მოსკოვში მოიკლა რადიაციული, ქიმიური და ბიოლოგიური დაცვის ჯარების მეთაური, გენერალ-პოლკოვნიკი იგორ კირილოვი; 2025 წლის დეკემბერში — გენერალ-ლეიტენანტი ფანილ სარვაროვი. რუსეთი ამ შეტევებს უკრაინის სპეცსამსახურებს აბრალებს; კიევი კომენტარს არ აკეთებს.