აზერბაიჯანის საგარეო საქმეთა სამინისტრომ საქართველოს საპატრიარქო „ტერიტორიული პრეტენზიების“ შემცველ მიდგომაში დაადანაშაულა. ამ რეაქციას წინ უძღოდა საპატრიარქოს შეშფოთება აზერბაიჯანის ტერიტორიაზე მდებარე იმ ეკლესიაში მიმდინარე „სამუშაოების“ შესახებ გავრცელებულ ინფორმაციაზე, რომელსაც საპატრიარქო საქართველოსა და მისი ეკლესიის ისტორიული და სულიერი მემკვიდრეობის „უმნიშვნელოვანეს ძეგლად“ მიიჩნევს.

ერთი დღით ადრე გავრცელებულ განცხადებაში საპატრიარქომ აღნიშნა, რომ არ მიუღია ინფორმაცია აზერბაიჯანის სახელმწიფო უწყებების მიერ „ისტორიულ ჰერეთში, ქურმუხის წმინდა გიორგის სახელობის ტაძარში და მის ტერიტორიაზე მიმდინარე სამუშაოების შესახებ“. ამასთან, საპატრიარქომ შეშფოთება გამოთქვა სამუშაოების მიზნისა და ქართულ მხარესთან კოორდინაციის არარსებობის გამო. განცხადებას თან ერთვოდა ეკლესიის სხვადასხვა ნაწილის ფოტოები, რომლებიც წითელ-თეთრი ლენტითაა შემოღობილი.

საპასუხოდ, აზერბაიჯანის საგარეო საქმეთა სამინისტრომ განაცხადა, რომ მიუღებელია აზერბაიჯანის ტერიტორიაზე არსებული ადგილების „სხვა სახელებით“ მოხსენიება და „სომხური ეკლესიისთვის დამახასიათებელი მიდგომების გამეორების“ წინააღმდეგ გააფრთხილა.

აზერბაიჯანის კახის რაიონში მდებარე ეს ეკლესია არაერთხელ გამხდარა განსხვავებული ისტორიული ნარატივების სამიზნე, ერთი მხრივ, საქართველოს ხელისუფლებისა და საქართველოს მართლმადიდებელი ეკლესიის, ხოლო მეორე მხრივ აზერბაიჯანის სახელმწიფოს მხრიდან.

საქართველოს მართლმადიდებელი ეკლესია ამ ადგილს „ქურმუხის წმინდა გიორგის სახელობის ტაძარს“ უწოდებს და მას აღმოსავლეთ საქართველოს ისტორიულ ჰერეთში მართლმადიდებლური მემკვიდრეობის მნიშვნელოვან ძეგლად მიიჩნევს, თუმცა აღიარებს, რომ ტაძარი თანამედროვე აზერბაიჯანის ტერიტორიაზე მდებარეობს.

აზერბაიჯანის სახელმწიფო წყაროები მას „კურმუკის ტაძრად“ მოიხსენიებენ და აღნიშნავენ, რომ იგი უძველესი კავკასიის ალბანეთის სამეფოს პერიოდს განეკუთვნება. აზერბაიჯანული წყაროების თანახმად, ტაძარი 1892 წელს ცარისტულმა რუსეთმა აღადგინა როგორც რუსული ეკლესია, რომელიც მანამდე არსებულ ალბანურ ეკლესიას ეფუძნებოდა.