შინაგან საქმეთა სამინისტროს ცნობით, 7 ივნისს სოფელ ატენში გარდაცვლილი იპოვეს გორის პოლიციის განყოფილების დეტექტივი ბაქარ ბექაური. შიდა ქართლისა და მცხეთა-მთიანეთის საოლქო პროკურატურამ გამოძიება სისხლის სამართლის კოდექსის 115-ე მუხლით — „თვითმკვლელობამდე მიყვანა” — დაიწყო.

„შინაგან საქმეთა სამინისტრო ღრმა მწუხარებას გამოთქვამს შიდა ქართლის პოლიციის დეპარტამენტის თანამშრომლის, ბაქარ ბექაურის გარდაცვალების გამო და უსამძიმრებს დაღუპულის ოჯახსა და ახლობლებს” — ნათქვამია სამინისტროს განცხადებაში.

ეს სიკვდილი განსაკუთრებულ ყურადღებას იპყრობს კიდევ ერთი მსგავსი შემთხვევის ფონზე. 23 მაისს, სულ ორი კვირის წინ, ქალაქ ხაშურში, საკუთარ ავტომობილში, ცეცხლსასროლი იარაღით მიყენებული ჭრილობით გარდაცვლილი იპოვეს სახელმწიფო უსაფრთხოების სამსახურის ანტიკორუფციული სააგენტოს თანამშრომელი. იმ ფაქტზეც ამავე მუხლით გაიხსნა გამოძიება.

„საქართველოს სახელმწიფო უსაფრთხოების სამსახური ღრმა მწუხარებას გამოთქვამს ანტიკორუფციული სააგენტოს გამორჩეული, ღირსეული და პროფესიონალი თანამშრომლის გარდაცვალების გამო. მისი გარდაცვალება უდიდესი ტრაგედია და დანაკლისია ჩვენთვის” — ნათქვამი იყო სუსის მაშინდელ განცხადებაში.