სასამართლომ 27 მაისს გიგა ავალიანის საქმის კიდევ ერთ ეპიზოდზე ორი არასრულწლოვანი ცნო დამნაშავედ. ბრალდებული — ინიციალებით დ.ჩ. და ა.ნ. — სისხლის სამართლის სხვადასხვა მუხლით იდგნენ ბრალდებაში.

დ.ჩ., რომელიც ადრეულ ეპიზოდზე უკვე მსჯავრდადებულია ჯგუფური ძალადობის ორგანიზებაში, ახლა ავალიანის ჯანმრთელობის განზრახ მძიმე დაზიანების მომზადებაში ცნეს დამნაშავედ. ა.ნ. კი — განსაკუთრებით მძიმე დანაშაულის შეუტყობინებლობის გამო: „ცნობილი იყო, რომ მძიმე დანაშაული მზადდებოდა და ჩადენილი იყო, თუმცა სამართალდამცავ ორგანოებს არ შეატყობინა,” — განმარტა პროკურატურამ.

სასჯელის ზომას მოსამართლე 2 ივნისს 12:00-ზე გამოაცხადებს. დ.ჩ.-ს 13 წლამდე პატიმრობა ემუქრება, ა.ნ.-ს — 7 წლამდე. ორივეს სასჯელი 1/4-ით შეუმცირდება არასრულწლოვანთა მართლმსაჯულების კოდექსის შესაბამისად.

„ახალგაზრდა მოსამართლემ სწორი გადაწყვეტილება მიიღო,” — თქვა გიგა ავალიანის დედამ, ეკა კუპატაძემ. მისი სიტყვებით, ა.ნ.-ს დედამ გამარჯვებულ მხარეს ხმამაღლა წაუყენა საყვედური: „გიხარიათ, რომ უდანაშაულო ბავშვი ციხეში გამოკეტეთ?” — „ამათთვის ეს დანაშაული არ არის დანაშაული. ამათთვის ეს ყოველდღიურობაა; ამათთვის ძალადობა ნორმაა,” — უპასუხა კუპატაძემ.

შეგახსენებთ: 28 წლის მასწავლებელ გიგა ავალიანზე 2025 წელს თბილისში, თემქის დასახლებაში არასრულწლოვანებმა იძალადეს. მან 23 დღე იცოცხლა კომაში და 24 ოქტომბერს გარდაიცვალა. ამ საქმეზე ამ ეტაპისთვის ხუთი არასრულწლოვანია მსჯავრდადებული.