17 წლის ათუკა ბრეგაძე სამი თვის წინ, 3 მარტს, გარდაიცვალა. ის ბოლო ორი წლის განმავლობაში დიუშენის დისტროფიით გარდაცვლილ სამ ქართველ მოზარდს შორის ერთ-ერთია — სწორედ მაშინ, რაც ოჯახები ბავშვებისთვის სამკურნალო პრეპარატების შემოტანისთვის ბრძოლას შეუდგნენ.

მისი დედა, მაკა სეთურიძე, ამ ბრძოლის ერთ-ერთი ყველაზე ხმამაღალი სახე იყო: ჯანდაცვის მინისტრს პირადად სთხოვდა პრეპარატების ხელმისაწვდომობის უზრუნველყოფას, მონაწილეობდა მშობელთა საპროტესტო აქციებში, სამინისტროში შეხვედრებს ესწრებოდა.

ახლა ის ამბობს, ძალებს მოიკრებს და ისევ მშობლების გვერდით დადგება. „ამ ინტერვიუსაც იმიტომ დავთანხმდი, რომ ვიმედოვნებ, ჩემი შვილის ტრაგედიის გაზიარება ბავშვებისთვის რამეს შეცვლის”, — ამბობს სეთურიძე.

ბოლო დღეებში, სოციალური მედიის კამპანიის ფონზე, დიუშენის სინდრომის მქონე პაციენტებისათვის 2 მილიონ ლარამდე შეიგროვა.