თანამგზავრიდან გადაღებული კადრები ადასტურებს, რომ ატლანტის ოკეანისა და ხმელთაშუა ზღვის ვრცელი ტერიტორიები ჩვეულებრივზე ბევრად უფრო ცხელია. კოპერნიკის საზღვაო სამსახურმა (Copernicus Marine Service) 30 მაისს დაფიქსირებული მონაცემები გამოაქვეყნა, რომლის მიხედვითაც საზღვაო სიცხის ტალღა ახლა საფრანგეთის ჩრდილოეთ და დასავლეთ სანაპიროებთან, ესპანეთის სამხრეთ სანაპიროსთან და მონაკოს წყლებში მძვინვარებს.

ამ ყველაფრის ფონზე მეცნიერები აფრთხილებენ წყნარი ოკეანის ფენომენ „სუპერ ელ-ნინიოს” მოახლოებაზე.

80% ალბათობა ივნის-აგვისტოში

მსოფლიო მეტეოროლოგიური ორგანიზაციის (WMO) ექსპერტების შეფასებით, 80%-იანი ალბათობით „სუპერ ელ-ნინიო” 2026 წლის ივნის-აგვისტოში გამოვლინდება. ტროპიკულ წყნარ ოკეანეში წყლისქვეშა ფენების ტემპერატურა ნორმაზე 6°C-ით მაღლაა — ეს ასეთი პიკური მაჩვენებელია.

„სუპერ ელ-ნინიო” ნიშნავს, რომ ოკეანის ზედაპირის ტემპერატურა ნორმას 2°C-ზე მეტით აჭარბებს. ამგვარ პირობებში 2026 წელი ისტორიაში ყველაზე ცხელი წელი შეიძლება გახდეს და 2024 წლის რეკორდი გადალახოს.

სად შეიცვლება ამინდი?

ყოველი ელ-ნინიო ინდივიდუალურია, მაგრამ ექსპერტები შემდეგ ცვლილებებს პროგნოზირებენ:

• უხვი ნალექი — სამხრეთ ამერიკის სამხრეთი, აშშ-ის სამხრეთი, აფრიკის რქა, ცენტრალური აზია
• გვალვა და სიმშრალე — ცენტრალური ამერიკა, ინდონეზია, ავსტრალია, სამხრეთ აზიის ნაწილი

„უნდა მოვემზადოთ პოტენციურად ძლიერი ელ-ნინიოსთვის, რომელიც გააძლიერებს გვალვებს, ექსტრემალურ ნალექს და სიცხის ტალღებს,” — განაცხადა WMO-ს გენერალური მდივანი სელესტე საულო.

საფრთხე ფასებსა და მოსავალს

ანალიტიკოსები აფრთხილებენ, რომ ეს კლიმატური ანომალია შეიძლება გლობალურ სასურსათო კრიზისამდე მივიდეს. „ელ-ნინიოს მიერ სტიმულირებული ექსტრემალური პირობები საფრთხეს უქმნის ბანანს, ბრინჯს, ჩასა, ყავასა და ბევრ სხვა კულტურას,” — ამბობს კლიმატის ანალიტიკოსი გარეთ რედმონდ-კინგი. მისი პროგნოზით, ბრიტანეთში ნოემბრისთვის სურსათის ფასები შეიძლება 50%-ით მაღალი იყოს, ვიდრე 5 წლის წინ.