Astoria Grande-ს ოფიციალური ვებსაიტის მიხედვით, გემი 2026 წლის 26 მაისს სოჭიდან გამოდის, 27 მაისს ტრაბზონს მიადგება, ხოლო 28 მაისის 10:00-დან 29 მაისის 21:00-მდე ბათუმის პორტში გაჩერდება — 2023 წლის ივლისის შემდეგ პირველად.

Astoria Grande-ს ამ „დინამიური მოგზაურობის” სლოგანია „საყვარელი თურქეთი და სტუმართმოყვარე ბათუმი”. ბათუმს ასაღწერად იყენებენ „კონტრასტების ქალაქს, სადაც თანამედროვე არქიტექტურა საკურორტო თავისუფლებას ერწყმის”. ბილეთი — მთელი „კაიუტისთვის” — 304 000 რუბლიდან (დაახლ. 11 400 ლარი) იწყება.

2026 წლის ბოლომდე კომპანია ბათუმის ჩათვლით კიდევ 10-მდე კრუიზს გეგმავს, მათ შორის 27-30 დეკემბრის „სოჭი-ბათუმი-სოჭი” — სლოგანით „საყვარელი საქართველო”.

მთავრობის პასუხი

საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტო 18 მაისს გავრცელებულ განცხადებაში ინფორმაციას უარყოფს: „ბათუმის ნავსადგურში აღნიშნული გემის შემოსვლასთან დაკავშირებით არ არსებობს არც დადასტურებული განაცხადი და არც რაიმე შემოსვლის განაცხადი მუშავდება. მსგავსი ტიპის დაუზუსტებელი და ემოციურად მანიპულაციური განცხადებები მიზანმიმართულად ვრცელდება საზოგადოებაში დაძაბულობისა და სპეკულაციების შესაქმნელად”.

2023 წელს Astoria Grande ბათუმში ორჯერ ჩავიდა — 27 და 31 ივლისს — სადაც ხმაურიანი საპროტესტო აქციებით დახვდნენ. ერთ-ერთი მგზავრი, რომელიც ოკუპირებულ აფხაზეთში ყოფნას ადასტურებდა, პოლიციამ შეამოწმა. „ქართული ოცნების” თავმჯდომარემ, ირაკლი კობახიძემ პროტესტის მონაწილეებს „ქაჯობა” შეარქვა.