აშშ-ის წარმომადგენელთა პალატამ 8 ივნისს დაჩქარებული პროცედურით, ორპარტიული მხარდაჭერით დაამტკიცა კანონპროექტი H.R. 7668 — დოკუმენტი, რომელიც მიზნად ისახავს საქართველოში ჩინეთისა და რუსეთის გავლენების კვლევასა და შეკავებას. კანონპროექტი ახლა სენატს გადაეგზავნება.

სენატის მხარდაჭერის შემთხვევაში, კანონი სახელმწიფო მდივანს, ეროვნული უშიშროების სააგენტოს დირექტორთან და თავდაცვის მინისტრთან ერთად, ძალაში შესვლიდან 180 დღეში დაავალდებულებს წარადგინოს საიდუმლო ანგარიში — საქართველოში რუსეთისა და ჩინეთის სადაზვერვო ქსელების შეღწევისა და მათი ურთიერთთანამშრომლობის შესახებ.

კანონპროექტის ავტორი, რესპუბლიკელი კონგრესმენი ჯო უილსონი სართულზე გამოსვლისას განაცხადა: „არალეგიტიმური ‘ქართული ოცნების’ რეჟიმი ქვეყანას ყიდის ჩინეთის კომუნისტური პარტიისთვის, ომის დამნაშავე პუტინისთვის და ირანისთვის — ქართველი ხალხის სურვილებისა და აშშ-ის ინტერესების საწინააღმდეგოდ.”

კენჭისყრის შემდეგ რადიო თავისუფლებასთან საუბარში უილსონმა ხაზი გაუსვა, რომ ინიციატივა ქართველ ხალხს უჭერს მხარს, და არა ქვეყნის ამჟამინდელ ხელისუფლებას. „’ქართული ოცნება’ არ წარმოადგენს ქართველ ხალხს. ქართველ ხალხს სურს ძლიერი ურთიერთობა აშშ-სთან. ამისათვის ერთადერთი გზაა პოლიტიკური პატიმრების გათავისუფლება, თავისუფალი და სამართლიანი არჩევნების ჩატარება და ჩინეთის, რუსეთისა და ირანის მავნე გავლენების აღმოფხვრა,” — განაცხადა მან.

წარმომადგენელთა პალატის საგარეო საქმეთა კომიტეტის თავმჯდომარემ ბრაიან მასტმა კენჭისყრის დროს აღნიშნა, რომ ბოლო მოვლენებმა საქართველოს დემოკრატიული მდგომარეობის შესახებ „სერიოზული კითხვები” გააჩინა. „დღემდე რუსეთს ოკუპირებული აქვს საქართველოს სუვერენული ტერიტორიის 20 პროცენტი 2008 წლის შეჭრის შემდეგ,” — განაცხადა მასტმა.

მსგავსი ნორმა ასევე შეტანილია თავდაცვის ავტორიზაციის აქტში (NDAA), რომელიც წარმომადგენელთა პალატის შეიარაღებული ძალების კომიტეტმა დაამტკიცა და სენატის დამტკიცებას ელოდება.