ანაკლიის ღრმაწყლოვანი პორტის შესახებ ჩინურ-სინგაპურულ კონსორციუმ CCCC-სთან მიმდინარე მოლაპარაკებები 2026 წლის ბოლოს არ უნდა გადასცდეს — ეს პრემიერ-მინისტრ ირაკლი კობახიძის 25 მაისის ბრიფინგზე გაკეთებული განცხადებაა.

„ვნახოთ, ვფიქრობ, წლის ბოლოს არ უნდა გადასცეს ეს ყველაფერი. ძალიან მალე, უახლოეს თვეებში, უნდა იქნეს მიღებული გადაწყვეტილება თანამშრომლობის გაგრძელების კონკრეტულ მოდელთან დაკავშირებით,” — განაცხადა კობახიძემ.

2024 წლის 29 მაისს საქართველოს მთავრობამ გამოაცხადა, რომ ანაკლიის პორტის 49%-იან წილს ჩინურ-სინგაპურული კონსორციუმი ჩაიბარებს. ამ ეტაპზე ხელშეკრულება ჯერ კიდევ არ გაფორმებულა — მხარეები პროექტის დეტალურ საინვესტიციო შეთანხმებაზე მუშაობენ.

პრემიერის სიტყვით, 2029 წლისთვის პროექტის პირველი ფაზის დასრულება „აბსოლუტურად რეალურია”. მისივე განმარტებით, პარალელურად მუშაობენ გზა-სატრანსპორტო ინფრასტრუქტურასა და რკინიგზაზეც.

ანაკლიის პროექტი ამჟამად აშშ-ს ფოკუსშიც არის: ანდრეოლი 24-29 მაისს ვიზიტს ატარებს საქართველოში, რომლის ფარგლებშიც ეკონომიკის სამინისტრომ მას ანაკლიის პორტის პროექტი გააცნო. ცნობისთვის, ანაკლიის ნავსადგური შუა დერეფნის — ევროპა-აზიის სატრანზიტო მარშრუტის — „კრიტიკული რგოლია”.