ოპოზიციის ალიანსის განცხადებით, აქვთ ინფორმაცია, რომ “არსებობენ ადამიანები, რომლებსაც აქვთ სისტემური წამების ამსახველი მასალა” და მათ მოუწოდებენ, რომ გაასაჯაროონ. ამის შესახებ პარტია დროას წევრმა გიგა ლემონჯავამ ალიანსის ბრიფინგზე განაცხადა, რომელიც TV პირველის მიერ პოლიციაში წამებისა და არაადამიანური მოპყრობის ამსახველი კადრების გასაჯაროებას შეეხებოდა. 

ალიანსმა კიდევ ერთხელ მოუწოდა მოქალაქეებს, შეუერთდნენ 19:00 საათზე, ფილარმონიასთან დაგეგმილ აქცია-მსვლელობას.

“ყველამ ვნახეთ სისტემური წამების ამსახველი კადრები, რომელიც თავად პოლიციელებმა გადაიღეს ქობულეთის პოლიციაში და ამიტომ ყველას, ვისაც არ გინდათ ასეთ სახელმწიფოში ცხოვრება, მოგიწოდებთ, რომ დღეს, 19:00 საათზე, შევიკრიბოთ ფილარმონიასთან, საიდანაც გაიმართება საპროტესტი მსვლელობა რუსთაველის გამზირისკენ.

სისტემა ჟონავს და რამდენიც არ უნდა ეცადოს შინაგან საქმეთა სამინისტრო დაგვაჯეროს, რომ ვითომ ეს ყველაფერი არის ერთჯერადი, ეპიზოდური ძალადობის პაქტები, ყველამ კარგად ვიცით, რომ სინამდვილეში ეს არის სისტემური წამების პრაქტიკა, რომელიც არის დამკვიდრებული საქართველოს პოლიციაში, მის განყოფილებებში. რამდენიმე დღის წინ ჩვენ ვნახეთ გორში შემთხვევით გადაღებული ადამიანების წამების, ღირსების შელახვის ამსახველი კადრები.

ახლა უკვე ზუსტად ვიცით, რომ შინაგან საქმეთა სამინისტრის თანამშრომლები თავად იღებენ წამების ამსახველ ვიდეომასალას და აზიარებენ შემდეგ სხვადასხვა ჩეტებში. აქვე მინდა მოგმართოთ ყველას, ვისაც გაქვთ ასეთი მასალა იმიტომ, რომ ჩვენ გვაქვს ინფორმაცია და ვიცით, რომ არსებობენ ადამიანები, რომლებსაც აქვთ სისტემური წამების ამსახველი მასალა. გახადეთ ეს მასალა საჯარო, გაასაჯაროვეთ. ამით, ერთი მხრივ, შეამსუბუქებთ საკუთარ პასუხისმგებლობას, მეორე მხრივ, დაიცავთ სხვებს სისტემური წამებისგან.

აქვე მინდა ხაზი გავუსვა, რომ ზუსტად ამ წამების ფაქტის დროს, რაც ჩვენ გუშინ ვიხილეთ, აჭარის პოლიციის უფროსი იყო გრიგოლ ბესელია, რომლის ჩვენების საფუძველზე ციხეში ზის ჟურნალისტი მზია ამაღლობელი. ვინმეს სჯერა, რომ აჭარის პოლიციის უფროსმა არ იცოდა რა ხდებოდა ქობულეთის პოლიციის განყოფილებაში?! რა თქმა უნდა, არა. ამიტომ, ეს მოძალადე მწამებელი სისტემა უნდა დასრულდეს, დამხობა რეჟიმს, თავისუფლება რეჟიმის ტყვეებს” - განაცხადა ლემონჯავამ. 

შეგახსენებთ, რომ12 ივნისს, ნოდარ მელაძემ პოლიციაში წამებისა და არაადამიანური მოპყრობის კადრები გამოაქვეყნა. ჟურნალისტის ინფორმაციით, წამების კადრებს პოლიციელები იღებდნენ და საერთო ჩათში აგზავნიდნენ, ხოლო პირი რომელმაც ეს ჩატი გატეხა და ფაილები გადმოწერა, დააკავეს.

მოგვიანებით შინაგან საქმეთა სამინისტრომ გაავრცელა განცხადება, რომ საქმე ეხება 2022 წლის ზაფხულში, აჭარის რეგიონში, ქობულეთში, მივლინებით მყოფი, იმერეთის პოლიციის დეპარტამენტის სამ თანამშრომელს, რომლებმაც ჩაიდინეს კადრებში ასახული დანაშაული. აღნიშნული დანაშაული გამოვლინდა მიმდინარე წლის თებერვლის თვეში და 2026 წლის 23 თებერვალს საქართველოს პროკურატურის მიერ სამივე პოლიციელი დაკავებულ იქნა ბრალდებულის სახით.

ნოდარ მელაძემ პოლიციაში წამებისა და არაადამიანური მოპყრობის კადრები გამოაქვეყნა დანაშაული 2022 წელს ჩაიდინეს, სამივე პოლიციელი 2026-ში დააკავეს - შსს მელაძის ანონსზე