ოპოზიციონერ პოლიტიკოს ალეკო ელისაშვილს 13 წლით თავისუფლების აღკვეთა მიესაჯა მას შემდეგ, რაც სასამართლომ ის ტერორისტული აქტის ჩადენის მცდელობაში დამნაშავედ ცნო. ელისაშვილი 2025 წლის 29 ნოემბერს, გამთენიისას, თბილისის საქალაქო სასამართლოს კანცელარიის შენობის დაწვის მცდელობის ბრალდებით დააკავეს.

თბილისის საქალაქო სასამართლოს მოსამართლე გიორგი გელაშვილმა გადაწყვეტილება 10 ივლისს მიიღო. ელისაშვილი განაჩენის გამოცხადებას არ დასწრებია, რადგან მოსამართლემ ის სასამართლო დარბაზიდან გააძევა მას შემდეგ, რაც მან „ქართული ოცნების“ პრემიერ-მინისტრ ირაკლი კობახიძეს და სამართალდამცავი ორგანოების კოორდინაციის საკითხებში სახელმწიფო მინისტრ მამუკა მდინარაძეს აგინა.

მართალია ელისაშვილმა ჩადენილი ქმედება აღიარა, მან ტერორიზმის მცდელობის დანაშაული არ აღიარა. მისმა ადვოკატებმა ბრალდების ნაკლებად მძიმე დანაშაულად გადაკვალიფიცირება მოითხოვეს, რადგან, მათი თქმით, ელისაშვილს არ ჰქონია ტერორიზმთან დაკავშირებული განზრახვა.

ელისაშვილს ტერორიზმთან დაკავშირებით ცალკე ბრალდებაც აქვს წაყენებული, რომელიც 2025 წელს თბილისის საქალაქო სასამართლოს არქივის სავარაუდო დაწვის ინციდენტს უკავშირდება. ამ ბრალდებას ელისაშვილი და მისი ადვოკატები უარყოფენ.

ელისაშვილი წინასწარ პატიმრობაში 2025 წლის ნოემბრის ბოლოდან იმყოფებოდა მას შემდეგ, რაც იგი თბილისის საქალაქო სასამართლოს კანცელარიის შენობის დაწვის მცდელობის ბრალდებით დააკავეს. თავდაპირველად ხელისუფლებამ განაცხადა, რომ საქმეს სისხლის სამართლის კოდექსის 19-187-ე მუხლით იძიებდა, რაც ქონების დაზიანების ან განადგურების მცდელობას გულისხმობს. თუმცა, 30 ნოემბერს პროკურატურამ განაცხადა, რომ ელისაშვილს ბრალი 19-323-ე მუხლით წაუყენეს, რაც ტერორისტული აქტის განხორციელების მცდელობას გულისხმობს.

2026 წლის მარტში, პროკურატურამ ელისაშვილს ტერორისტული აქტის ჩადენასთან დაკავშირებულ მეორე ეპიზოდზე ბრალდება წარედგინა. პროკურატურის ინფორმაციით, საქმე ეხებოდა მაისში სასამართლოს არქივისთვის ცეცხლის წაკიდებას. მას ბრალი საქართველოს სისხლის სამართლის კოდექსის 187-ე მუხლით წაუყენეს.