4 ივნისს თბილისის საქალაქო სასამართლოში ბაჩო ახალაიას „დამხობის მოწოდების” საქმის არსებითი განხილვის პირველი სხდომა გაიმართა. ახალაიამ სხდომაზეც ბევრი ისაუბრა ხელისუფლების დამხობის საჭიროებაზე — თუმცა კვლავ ამბობს, რომ ეს პოზიციის გამოხატვაა და არა მოწოდება.

„ვთქვი, რომ ეს ხელისუფლება უნდა დაემხოს. სხვა საკითხია, ვინ მიიჩნევს, რომ დიქტატურა არსებობს. თუ ვცხოვრობთ დიქტატურაში, გვაქვს უფლება ამ დიქტატურის დამხობის,” — განაცხადა მან.

ახალაიამ განმარტა, რომ ადამიანს ბუნებრივი უფლება, ვალდებულებაც კი, აქვს — დაუდგეს წინ მას, ვინც სროლას უპირებს. ბიძინა ივანიშვილი კი, მისი თქმით, „ადამიანების ქვეცნობიერს ეუბნება — მე თქვენ გესვრით”.

„თუ კარგად დავაკვირდებით, სად ვცხოვრობთ, საზოგადოება მიხვდება, რომ ვცხოვრობთ აბსურდში, სადაც ადამიანებს ტროტუარზე დგომის გამო იჭერენ… ამ ყველაფრის არჩევნების გზით შეცვლა შეუძლებელია. თუ ხელისუფლება ადამიანის ნებაზე ძალადობს, ერთადერთი გამოსავალი დამხობაა,” — ამბობს ახალაია.

მოსამართლე ტყეშელაშვილს მიმართა: „თქვენ გადაწყვიტეთ — მოწოდებაა ეს, თუ ჩემი მოსაზრება. კი ბატონო, თქვენ გადაწყვიტეთ, არის თუ არა ეს დანაშაული.”

ახალაიას ბრალი სახელმწიფო უსაფრთხოების სამსახურმა 2026 წლის 16 თებერვლის სასამართლო სხდომაზე წარმოთქმული სიტყვების გამო წარუდგინა. სისხლის სამართლის კოდექსის 317-ე მუხლი სამ წლამდე პატიმრობას ითვალისწინებს. მის წინააღმდეგ ასევე მიმდინარეობს 225-ე მუხლით განხილვა — 2025 წლის 4 ოქტომბრის „მშვიდობიანი დამხობის” აქციის ორგანიზებასთან დაკავშირებით, სადაც სასჯელი 9 წლამდე თავისუფლების აღკვეთას შეადგენს.

ახალაიამ განაცხადა: „საბოლოოდ — ქართველი ხალხის მიერ დამხობილი იქნება ივანიშვილის ხელისუფლება და ამას მოჰყვება ამ რეჟიმის გასამართლება.”