1992-1993 წლების აფხაზეთის შეიარაღებული კონფლიქტის შედეგად უგზო-უკვლოდ დაკარგული 11 ადამიანის იდენტიფიცირებული ნეშტი ოჯახებს გადაეცა, განაცხადა წითელი ჯვრის საერთაშორისო კომიტეტმა (ICRC) 18 მაისს.

„ეს შესაძლებელი გახდა 1992-1993 წლების შეიარაღებული კონფლიქტის და მის შემდგომ მოვლენებთან დაკავშირებით უგზო-უკვლოდ დაკარგულ პირთა კოორდინაციის მექანიზმის ჰუმანიტარული მანდატის ფარგლებში, რომელიც 2010 წლიდან ICRC-ის მხარდაჭერით ფუნქციონირებს და აფხაზ და ქართველ მონაწილეებს აერთიანებს”, — განაცხადა ICRC-მ.

11 ადამიანს შორის ცხრა მშვიდობიანი მოქალაქე და ორი სამხედრო მოსამსახურეა. სამოქალაქო პანაშვიდი თბილისის წმინდა სამების საკათედრო ტაძარში გაიმართა. სამძიმარი მიაგეს „ქართული ოცნების” მიერ არჩეულმა პრეზიდენტმა მიხეილ ყაველაშვილმა და შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა. იდენტიფიცირებული პირები სხვადასხვა რეგიონში, საგვარეულო სასაფლაოებზე დაიკრძალებიან.

სახელმწიფო მინისტრის აპარატის ინფორმაციით, 2013 წლიდან დღემდე, ამ მექანიზმების ფარგლებში, 740 ადამიანის ნეშტი მოიძიეს, 334 — იდენტიფიცირდა. 1 900-მდე ადამიანი კვლავ უგზო-უკვლოდ დაკარგულად ითვლება.