ჟურნალისტი აფგან სადიგოვი, რომლის დეპორტაციაც საქართველოდან აზერბაიჯანში აპრილში განხორციელდა, დააკავეს. ეს ინფორმაცია მისმა ადვოკატმა, თამთა მიქელაძემ სოციალურ ქსელში 9 ივნისს დაადასტურა და აღნიშნა, რომ იგი დააკავეს „იმავე საქმეზე, რომლის საფუძველზეც აზერბაიჯანი მის ექსტრადიციას ბაქოში ითხოვდა“ და რომ მისი სისხლისსამართლებრივი დევნა განახლდა.  სადიგოვის დაკავებამდე ერთი დღით ადრე, მისმა მეუღლემ განაცხადა, რომ ის „ძალით“ წაიყვანეს „სამოქალაქო ტანსაცმელში ჩაცმულმა ნიღბიანმა პირებმა“, სავარაუდოდ, აზერბაიჯანის გენერალურ პროკურატურაში.მიქელაძემ აღნიშნა, რომ აპრილის დასაწყისში „აზერბაიჯანის ოფიციალური პოზიცია იყო, რომ ამ საქმეზე ჟურნალისტის მიმართ გამოძიება და დევნა შეწყვეტილი იყო და, შესაბამისად, ექსტრადიციის მოთხოვნაც შეჩერდა, რადგან ამის სამართლებრივი საფუძველი აღარ არსებობდა“.„ახლა კი, აზერბაიჯანში დეპორტაციიდან 65 დღეში, ის იმავე საქმეზე, იმავე საფუძვლით დააკავეს“, – განაცხადა მიქელაძემ და დასძინა, რომ საქმე „ძალიან კარგად აჩვენებს, რომ ეს პროცესი წინასწარ დაგეგმილი, კოორდინირებული და ფაბრიკაციული სპეცოპერაცია იყო, რომელშიც „ქართული ოცნების“ რეჟიმიც ღიად მონაწილეობდა“.სადიგოვი 4 აპრილს გვიან ღამით თბილისში დააკავეს „სოციალურ მედიაში პოლიციელის შეურაცხყოფის“ ბრალდებით, რის შემდეგაც მალევე სასამართლომ მისი დეპორტაციის გადაწყვეტილება მიიღო იმ კანონმდებლობის შესაბამისად, რომელიც ადმინისტრაციული სამართალდარღვევების ჩამდენი უცხოელების დეპორტაციას ითვალისწინებს. ჟურნალისტი საქართველოში 2023 წლიდან ცხოვრობდა და შვიდ თვეზე მეტი გაატარა წინასაექსტრადიციო პატიმრობაში მას შემდეგ, რაც საქართველოს ხელისუფლებამ 2024 წლის აგვისტოში დააკავა. იგი გირაოთი გაათავისუფლეს 2025 წლის აპრილში, მას შემდეგ, რაც ადამიანის უფლებათა ევროპულმა სასამართლომ შუალედური გადაწყვეტილება მიიღო მისი აზერბაიჯანში ექსტრადიციის აკრძალვის შესახებ.This post is also available in:

English Tagsაფგან სადიგოვი

Copy URL URL Copied