2 ივნისს აჭარის საზოგადოებრივი მაუწყებლის 14 თანამშრომელს ხელშეკრულების შეწყვეტის შეტყობინება გაეგზავნა. ინფორმაცია პირველად „მედია ჩეკერმა” გაავრცელა, შემდეგ კი მაუწყებლის დირექტორმა ირაკლი კიკვაძემ გათავისუფლებები დაადასტურა.

„ამ ეტაპზე, ინფრასტრუქტურული და სხვა მიზეზების გამო, ბევრი გადაცემის გაუქმება მოგვიწია. ადამიანებს საეთერო დრო მაშინ მიეცემათ, როცა ამის პირობები შეიქმნება,” — განაცხადა კიკვაძემ.

საქართველოს ჟურნალისტური ეთიკის ქარტია გათავისუფლებებს „უსამართლოდ და დაუსაბუთებლად” მიიჩნევს. ქარტიის განცხადებით, გათავისუფლებული ჟურნალისტები „კრიტიკული შეკითხვებითა და პროფესიონალიზმით გამოირჩეოდნენ”, ხოლო ნაწილი თავადაც მიიჩნევს, რომ სწორედ კრიტიკული პოზიციის გამო დაკარგა სამსახური. „ეს კრიტიკული აზრისგან მაუწყებლის დაცლის მცდელობა და საინფორმაციო ველის მოსუფთავებაა,” — აცხადებს ქარტია.

გათავისუფლებულ ჟურნალისტთა შორის ირინა ყურუა, გადაცემა „სათქმელის” ავტორი, ამბობს, რომ ასეთი განვითარება მოსალოდნელი იყო: „ეს არის კრიტიკულად მოაზროვნე ჟურნალისტების ეტაპობრივი განდევნის გაგრძელება. „სათქმელი” იყო იშვიათად შემორჩენილი სივრცე, სადაც განსხვავებული, კრიტიკული ხმები ისმოდა.”

მედიაორგანიზაციები, რომლებიც საქართველოში მედიის საქმიანობას ადევნებენ თვალს, ამ გადაწყვეტილებას კრიტიკული გაშუქების წინააღმდეგ მიმართულ ნაბიჯად განიხილავენ.