10 ივნისს, სამი ქვეყნის ერთობლივი ოპერაციის ფარგლებში, აჭარის ტერიტორიაზე ორი უცხო ქვეყნის მოქალაქე დააკავეს. გენერალური პროკურატურის ცნობით, ბრალდებულები ფსევდონიმ AudiA6-ის ქვეშ მოქმედი ორგანიზებული დანაშაულებრივი ჯგუფის წევრები არიან, რომელიც 2022 წლიდან ფუნქციონირებდა.

2022-2025 წლებში ჯგუფმა კიბერდამნაშავეებისა და სხვა კრიმინალებისთვის რამდენიმე ასეული მილიონი დოლარის ღირებულების კრიპტოვალუტა გაათეთრა — ანუ დანაშაულებრივი გზით მოპოვებული თანხების კვალი სამართალდამცავებისგან დამალა.

ჯგუფი ასევე მართავდა Dark2Web კიბერკრიმინალურ ფორუმს — პლატფორმას, რომელიც მსოფლიო მასშტაბით კიბერდამნაშავეებს აკავშირებდა და უკანონო სერვისებს ავრცელებდა.

ოპერაციაში მონაწილეობდნენ საქართველოს პროკურატურა, შინაგან საქმეთა სამინისტრო, ფინანსთა სამინისტროს საგამოძიებო სამსახური, ევროჯასტი, ევროპოლი, ამერიკის საიდუმლო სამსახური, პოლონეთის კიბერდანაშაულის ცენტრალური ბიურო და ლოძის პროკურატურა.