წითელი ჯვრის საერთაშორისო კომიტეტმა (ICRC) 18 მაისს განაცხადა, რომ 1992–1993 წლების აფხაზეთის შეიარაღებული კონფლიქტის შედეგად დაკარგული 11 პირის იდენტიფიცირებული ნეშტი მათ ოჯახებს გადაეცა.

ნეშტების გადაცემა ლევან სამხარაულის სახელობის სასამართლო ექსპერტიზის ეროვნულ ბიუროში გაიმართა. ღონისძიებაში მონაწილეობდნენ დაკარგულ პირთა ოჯახები, შერიგებისა და სამოქალაქო თანასწორობის საკითხებში სახელმწიფო მინისტრის აპარატი და ICRC-ის წარმომადგენლები.

11 გარდაცვლილიდან ცხრა მშვიდობიანი მოქალაქეა, ორი — სამხედრო მოსამსახურე. სამოქალაქო პანაშვიდი თბილისის წმინდა სამების საკათედრო ტაძარში გაიმართა. პატივი მიაგეს პრეზიდენტმა მიხეილ ყაველაშვილმა და სახელმწიფო მინისტრმა თეა ახვლედიანმა. ახვლედიანის უწყების ინფორმაციით, ყველა დაკარგული სათანადო პატივით საგვარეულო სასაფლაოებზე დაიკრძალება.

ICRC-ის ხელმძღვანელობით მოქმედი მექანიზმი, რომელიც ქართველ და აფხაზ მონაწილეებს აერთიანებს, 2010 წლიდან ფუნქციონირებს. 2013 წლიდან დღემდე ნაპოვნია 740 ადამიანის ნეშტი, მათგან იდენტიფიცირებულია 334. 1900-ზე მეტი ადამიანი კვლავ უგზო-უკვლოდ დაკარგულად ითვლება.