მალტაში მიმდინარე FIBA U16 ქალთა ევრობასკეტის C დივიზიონში საქართველოს 16 წლამდე გოგონათა ეროვნულმა ნაკრებმა ჯგუფური ეტაპი დაასრულა და ნახევარფინალის საგზური მოიპოვა.

ევროპის ჩემპიონატის C დივიზიონის შეხვედრებს მალტა 7-დან 12 ივლისის ჩათვლით მასპინძლობს. ტურნირში სულ 7 ეროვნული გუნდი მონაწილეობს, რომლებიც ორ ჯგუფში არიან გადანაწილებულნი:

A ჯგუფი: საქართველო, მალტა, კოსოვო. B ჯგუფი: ალბანეთი, სომხეთი, მოლდოვა, გიბრალტარი.

საქართველოს ნაკრებმა ასპარეზობა A ჯგუფში დაძაბული შეხვედრით დაიწყო — 7 ივლისს გამართულ სადებიუტო მატჩში ტურნირის მასპინძელ მალტასთან მინიმალური სხვაობით, 59:61 დამარცხდა.

მეორე სათამაშო დღეს, 8 ივლისს, ქართველმა კალათბურთელებმა დამაჯერებელი რევანში აიღეს და კოსოვოს ნაკრები დიდი სხვაობით, 77:39 დაამარცხეს.

კოსოვოსთან მატჩის სტატისტიკა: ლიზი ხუბუა: 15 ქულა, 7 მოხსნა, 5 ჩაჭრა, ლიზი ჯაბუა: 13 ქულა, 6 მოხსნა, 3 ჩაჭრა, მარიამ ცერცვაძე: 11 ქულა, ნინი ივანიძე: 10 ქულა, 7 მოხსნა, 4 ჩაჭრა, ელენე კალანდარიშვილი: 9 ქულა, ბაია ზურაბიშვილი: 9 ქულა, 5 პასი, 5 ჩაჭრა, მარიამ კეკელია: 8 ქულა, 6 მოხსნა.

A ჯგუფიდან ნახევარფინალში ორი საუკეთესო გუნდი გადის. რადგან საქართველოს 1 მოგება და 1 მარცხი აქვს (3 ქულა) და ბურთების ბალანსიც გვარიანად პლუსებშია, ნაკრებმა ჯგუფიდან გასვლა უკვე განაღდა.

ჯგუფში საბოლოო ადგილების განაწილება მალტასა და კოსოვოს შორის გასამართ შეხვედრაზეა დამოკიდებული:

მალტას გამარჯვების შემთხვევაში: მალტა დაიკავებს პირველ ადგილს, ხოლო საქართველო ჯგუფში მეორე პოზიციიდან გავა. კოსოვოს გამარჯვების შემთხვევაში: შეიქმნება სამგუნდიანი თანაბარი ბალანსი, სადაც ბურთების უკეთესი სხვაობის წყალობით საქართველოს პირველ ადგილზე გასვლის შანსი ექნება.

ნახევარფინალში გუნდები ჯვარედინი სისტემით დაწყვილდებიან — A ჯგუფის გამარჯვებული B ჯგუფის მეორეადგილოსანს შეხვდება, ხოლო A ჯგუფის მეორეადგილოსანი B ჯგუფის გამარჯვებულს დაუპირისპირდება.

შესაბამისად, გიორგი გოლიაძისა და მაია ჩარგეიშვილის გაწვრთნილი საქართველოს 16-წლამდელთა ნაკრები ნახევარფინალურ მეტოქეს A და B ჯგუფების დასკვნითი მატჩების დასრულების შემდეგ შეიტყობს.

ტურნირის დებულების თანახმად, C დივიზიონის გამარჯვებული ჩემპიონის ტიტულთან ერთად გაიღებს B დივიზიონის საგზურს.